მოვითხოვთ მასწავლებელთა გამოცდის დამატებით სესიას 2026 წლის ივლისამდე

​საქართველოს განათლებისა და მეცნიერების სამინისტროს

​პეტიცია მასწავლებელთა საგნის სასერტიფიკაციო გამოცდების დამატებითი სესიის ჩატარების მოთხოვნით

​პატივცემულო მინისტრო,

​მოგმართავთ, როგორც საქართველოს განათლების სისტემის კეთილდღეობაზე გულწრფელად მზრუნველი ადამიანები. ჩვენ, მასწავლებლობის მსურველები, მოქმედი პრაქტიკოსები და განათლების სფეროს პროფესიონალები, ვაღიარებთ სერტიფიცირების პროცესის მნიშვნელობას, თუმცა, ამავდროულად, მოგმართავთ თხოვნით, კიდევ ერთხელ გადახედოთ მასწავლებელთა გამოცდების ჩატარების ფორმატს და 2026 წლის ივლისამდე დამატებითი საგამოცდო სესია დანიშნოთ.

​ჩვენი თხოვნა არ არის მხოლოდ პირადი ინტერესების გამოხატულება. ის განპირობებულია რამდენიმე ფუნდამენტური ფაქტორით, რომლებიც პირდაპირ აისახება განათლების სისტემის ხარისხზე:

 

​მიმდინარე წლის განათლების სფეროში განხორციელებული საკანონმდებლო ცვლილებების გათვალისწინებით, რომელიც ძალაში 2025 წლის 1 ივლისიდან შედის, მასწავლებლებს საგნობრივი ჯგუფების ფარგლებში მხოლოდ იმ საგნის სწავლება შეეძლებათ, რომლის გამოცდაც წარმატებით აქვთ ჩაბარებული.

​ჩვენი აზრით, ეს ცვლილება სერიოზულ პრობლემებს უქმნის იმ მასწავლებლებს, რომლებსაც ამ დრომდე საგნობრივი ჯგუფის რამდენიმე საგნის სწავლების უფლება ჰქონდათ. ამის გამო ისინი შესაძლოა სამსახურის გარეშე დარჩნენ ან მათი შრომა სათანადოდ არ დაფასდეს.

​იმისათვის, რომ მასწავლებლებს მიეცეთ საკუთარი კომპეტენციის დადასტურებისა და სრულფასოვანი მუშაობის გაგრძელების საშუალება, აუცილებელია, გამოცდების ეროვნულმა ცენტრმა დამატებითი საგამოცდო სესია დანიშნოს 2026 წლის ივლისამდე. ეს მათ საშუალებას მისცემს, ჩააბარონ გამოცდა იმ საგნებში, რომელთა სწავლებაც კანონის მოთხოვნებიდან გამომდინარე, ახლა უკვე აუცილებლობას წარმოადგენს.

​სტრესი და უსამართლო გარემო: გამოცდის წელიწადში მხოლოდ ერთხელ ჩატარება კანდიდატებში იწვევს უკიდურეს სტრესს და შფოთვას. მათ იციან, რომ ერთი წარუმატებელი მცდელობა მთელი წლის დაკარგვას ნიშნავს. ამას ემატება ისეთი ობიექტური მიზეზები, როგორიცაა ჯანმრთელობის მოულოდნელი პრობლემები ან ტექნიკური შეფერხებები, რამაც შეიძლება გამოცდაზე არყოფნის ან მისი წარუმატებლობის მიზეზი გახდეს. დამატებითი საგამოცდო სესია ასეთ კანდიდატებს სამართლიან შესაძლებლობას მისცემს, დაამტკიცონ თავიანთი კომპეტენცია.

​პედაგოგების დეფიციტი: საქართველოს მასშტაბით, განსაკუთრებით კი რეგიონულ სკოლებში, სერტიფიცირებული მასწავლებლების დეფიციტი კრიტიკულია. ამ პრობლემის მოგვარების ერთ-ერთი უმთავრესი გზაა ახალი, მოტივირებული კადრების მოზიდვა, რომლებსაც შეუძლიათ შეავსონ არსებული ვაკანტური ადგილები. თუ ამ ადამიანებს მხოლოდ ერთხელ ეძლევათ გამოცდის ჩაბარების შესაძლებლობა, ბევრი მათგანი უბრალოდ ვერ ახერხებს სისტემაში შესვლას, მიუხედავად იმისა, რომ მათ აქვთ საჭირო ცოდნა და უნარები. მეორე გამოცდის ჩატარება ამ პრობლემის გადაჭრის უმოკლესი და ყველაზე ეფექტიანი გზაა.

​პროფესიულ განვითარებაზე ზრუნვა: მასწავლებლის მომზადების საგანმანათლებლო პროგრამებზე ჩასაბარებლად საგნის გამოცდის წარმატებით ჩაბარება წინაპირობაა. როდესაც კანდიდატი ერთი გამოცდის გამო ვერ აგრძელებს სწავლას, ის კარგავს არა მხოლოდ ერთ წელს, არამედ შესაძლებლობას, გახდეს უფრო კვალიფიციური პედაგოგი. ეს კი პირდაპირ აზიანებს განათლების სისტემას და აფერხებს მის განვითარებას.

​გთხოვთ, გაიხსენოთ წარსული პრეცედენტები, როდესაც მსგავსი პრობლემების მოსაგვარებლად განათლების სამინისტრომ გამოიყენა მოქნილი მიდგომები და ერთ წელიწადში ორჯერ ჩაატარა მასწავლებელთა გამოცდები (მაგალითად, 2014 და 2019 წლებში). ეს პრაქტიკა იყო წარმატებული და ხელი შეუწყო ათასობით პედაგოგის პროფესიულ ზრდას.

​ჩვენ მზად ვართ, გამოვიყენოთ ეს შესაძლებლობა, კიდევ უფრო დაუღალავად ვიმუშაოთ და დავამტკიცოთ, რომ ღირსეული პედაგოგები ვართ. გვჯერა, რომ თქვენი სამინისტრო გაიზიარებს ჩვენს ხედვას და გადადგამს ამ მნიშვნელოვან ნაბიჯს, რომელიც უშუალოდ ჩვენი შვილებისა და ქვეყნის ნათელ მომავალზე ზრუნვას ემსახურება.

​პატივისცემით,

​მასწავლებლობის მსურველები და მოქმედი პრაქტიკოსი მასწავლებლები.